Það er skemmtilegt að fá nemendur til að gera litlar kannanir um ýmis efni og þau hafa yfirleitt gaman að því. Aðalmálið er, hvaða form er einfalt, þægilegt OG KOSTAR EKKERT! Það er hægt að nota Google forms og það er hægt að nota sambærilegt í Office. Ég setti upp einfaldar leiðbeiningar (eða ég held að þær séu það) og var bara að fatta að ég hef aldrei sett þær inn á síðuna og dreif í því núna. Ég nota Google forms en bendi mínum nemendum að þau geti líka notað Office en leiðbeiningarnar eru á Google einfaldlega af því þegar ég gerði þær vissi ég ekki af möguleikanum í Office.

Google forms er ótrúlega auðvelt og hægt að láta könnunina líta skemmtilega út. Gallinn er hinsvegar sá að þarna eru engir útreikningar heldur eingöngu talin svörin, fyrir suma er það nóg. Ég gerði myndband fyrir nemendur mína um cross analysis þar sem þau geta parað saman breyturnar og svörin ef við viljum fá að vita hversu margir af hvaða kyni eða búsetu eða eitthvað annað. Eflaust er hægt að fara margar leiðir að þessu en þetta hefur virkað ágætlega (þó sumir hafi tárast yfir þessu – stundum þarf líka að gera erfitt). En alla vega set þetta út núna þar sem ég veit að margir eru í þeim sporum að nemendur eru að skella upp könnunum fljótlega. Það eru líka tvö myndbönd varðandi uppsetningu ef við erum með algjörlega tölvuólæsa nemendur 😉

Það skemmtilegasta við þetta form er að þau geta fylgst með hversu margir svara og verða oft ótrúlega spennt.

Nú þegar allt er komið á fullt í framhaldsskólunum er um að gera að minna nemendur á talgervilinn í Edge vafranum. Það getur aðstoðað nemendur sem eiga auðveldara með læra með því að hlusta á námsefnið. Námsefnið verður að vera á PDF formi. Hér eru leiðbeiningar um hvernig hægt er að gera þetta: https://kennsluradgjof.com/microsoft-edge-talgervill/

Ég er aðeins að reyna að koma inn atriðum sem fólk hefur verið að spyrja um. Hér er örstutt myndband varðandi hvernig hægt er að skrá lágmarkseinkunn í einkunnaregluna. Hægt er að skrá á ákveðna námsþætti innan námsmatsins eða á allt námskeiðið í heild. Fer bara eftir námsmatinu sem þú ert með. Hér er tengill yfir á Innu leiðbeiningarnar og fyrir neðan er tengill beint á myndbandið.

Loksins er búið að klára að uppfæra síðuna og vonandi er hún einfaldari en áður. Komið er inn eitthvað af nýju efni undir Annað/kennslufræði og verið að vinna í meiru.

Einnig er að verið að bæta inn efni um INNU leiðbeiningarnar. Kom í ljós að það vantaði ýmislegt sem hefur bæst við hjá INNU í sumar.

Hugmyndir um efni eru vel þegnar og eins ef leiðbeiningar eru ekki nógu skýrar.